‘വർഗീയതെക്കെതിരെ’ എന്ന കാപ്ഷനോടെയായിരിക്കും പലപ്പോഴും സി.പി.എമ്മും ഡിഫിയും എസ്.എഫ്.ഐയുമൊക്കെ കാംപയിനുകളും കേരള യാത്രകളും മറ്റും നടത്താറ്. “മതങ്ങൾക്കതീതമായി മനുഷ്യനാവണം” എന്ന് ബിജിഎം ഇട്ടും അല്ലാതെയും ഡയലോഗും പാട്ടും സുലഭമായിരിക്കും. തനി കാപട്യമല്ലാതെ മറ്റൊന്നുമല്ല അതെല്ലാമെന്ന് തെളിയുന്ന നിരവധി സംഭവങ്ങൾ ഇവിടെ അരങ്ങേറിയിട്ടുണ്ട്. മുസ്‌ലിം വിരുദ്ധത ഒളിഞ്ഞും തെളിഞ്ഞും ഉപയോഗപ്പെടുത്തുന്ന ഇവരുടെ കുത്സിത പ്രവർത്തനങ്ങൾ ‘മാഷാ അല്ല’യിൽ തുടങ്ങിയതോ ‘കാഫിറി’ൽ അവസാനിക്കുന്നതോ ആവില്ല. കാഫിർ സ്ക്രീൻ ഷോട്ട് വെച്ച് ഇടത്പക്ഷം നടത്തിയ പ്രചരണം തെരെഞ്ഞെടുപ്പ് റിസൽറ്റിൽ അവർക്ക് ഉപകാരപ്പെട്ടില്ലെങ്കിലും സാമൂഹികാന്തരീക്ഷത്തെ വേണ്ടുവോളം മലിനപ്പെടുത്തിയിട്ടുണ്ട്. ആ മലിനജലത്തിൽ കൃഷിയിറക്കുന്നതാകട്ടെ സംഘ്പരിവാറുമാണ്.